ШЫМКЕНТ ТҰРҒЫНДАРЫ АСТАНАДАҒЫ ӘСКЕРИ ШЕРУДІ ТІКЕЛЕЙ ЭФИРДЕН ТАМАШАЛАДЫ
Астанадағы салтанатты әскери шеру биыл ерекше өтті. Бұл маңызды шараны Шымкент халқы да елеусіз қалдырмады. Қаладағы Астана алаңы, Жастар ресурстық орталығы және Қызғалдақ фонтаны маңында орнатылған экрандардан тұрғындар парадты тікелей эфирде тамашалады. Ал Түркістан сарайында жеке әскери құрам да тарихи сәттің куәсі болды.
Биылғы парадқа Шымкент қаласындағы №35748 әскери бөлімінің өкілдері де белсенді қатысты. Аталған бөлімнің үрмелі аспаптар оркестры шеруде өнер көрсетіп, мерекелік көңіл-күйге өз үлестерін қосты. Сонымен қатар осы бөлімнен 7 әйел әскери қызметкер сап түзеп, парадқа қатысушылар қатарынан көрінді. Олар – әскери қызметтің әр саласында абыроймен еңбек етіп жүрген нәзік жандылар. Шеруге қаламыздың басқа да әскери бөлімдерінен арнайы техникалар мен әскери қызметкерлер және сарбаздар жұмылдырылды.
Әскери парадты Шымкенттің авиа әскери бөлімі экипаждарының 6 Су-25 штурмовиктері қорытындылады. Топты әскери жауынгер, І-сынып ұшқышы, ІІ-ші дәрежелі «Айбын» орденінің ковалері, полковник Ғайрат Талапшоев басқарды. Олар еліміздің басты алаңынан аспан астындағы Қазақстан Республикасы Туының бейнесін салып шықты.
Айта кетейік, бұл мерекелік шараны көзбен көру мүмкіндігі Шымкенттен арнайы Астанаға барған 15 еңбек ардагеріне де бұйырды.
– Менің атам мен әкем де сұрапыл соғысқа қатысқан. Бүгінгідей бейбіт заманда осындай шараларды өз көзімізбен көру – біз үшін үлкен мәртебе. Елдің қорғаныс қабілетін көріп, жастардың сап түзегенін тамашалау – болашаққа деген сенімді күшейтеді, – дейді қала тұрғыны, зейнеткер Өтелбай Амалбеков.
Әскери шеру – еліміздің қорғаныс қабілеті мен бірлігін көрсететін маңызды шара. Бұл күн Шымкент тұрғындарына отаншылдық рух, мақтаныш сыйлап, айрықша әсер қалдырды.
ПІКІР ЖАЗУ
