ТҮРКІСТАНДА КӨПБАЛАЛЫ АНАЛАРҒА «АЛТЫН» ЖӘНЕ «КҮМІС АЛҚАЛАР» ТАБЫСТАЛДЫ

Түркістан – тек тарихи және рухани астана ғана емес, ұлттық құндылықтар мен отбасылық дәстүрлерді ардақтайтын ерекше мекен. Бұл қалада ананың орны мен еңбегі әрдайым жоғары бағаланып келеді. Соның бір айғағы ретінде жуырда Түркістан қаласы әкімінің міндетін уақытша атқарушы Байдулла Оразбековтың қатысуымен өткен көпбалалы аналарды марапаттау рәсімін атауға болады.

Іс-шарада ел болашағын тәрбиелеуде айрықша үлес қосып жүрген аналарға «Алтын алқа» және «Күміс алқа» мемлекеттік наградалары салтанатты түрде табысталды. Бұл – тек марапаттау рәсімі ғана емес, анаға деген шынайы алғыс пен рухани құрметтің жарқын көрінісі. Іс-шара барысында сөз сөйлеген Байдулла Оразбеков аналардың отбасындағы, қоғамдағы ерекше рөліне тоқталып, бұл марапаттаулар – аналардың маңдай терімен, сабыры мен мейірімі арқылы ұрпақ тәрбиесіне қосқан үлесінің нақты бағалануы екенін атап өтті. Нақтырағы, өз сөзінде «Ананың мейірімі мен төзімі – ұлттың баға жетпес байлығы. Бұл – сіздерге деген зор құрметтің белгісі» деді.  Мұндай сөздер – тек ресми лебіз емес, қазақ қоғамының анаға деген ежелгі құрметінің жаңғыра түскен заманауи үлгісі. Қазіргі таңда Түркістан қаласында 15 739 көпбалалы ана тіркелген. Оның ішінде 1 098 ана – «Алтын алқа», 2 366 ана – «Күміс алқа» иегері, 71 анаға «Батыр ана» атағы берілген. 95 ана – І және ІІ дәрежелі «Ана даңқы» орденімен марапатталған. 18 жасқа дейінгі 4 және одан да көп баласы бар аналар саны – 12 109. Бұл деректер Түркістан өңірінің жоғары демографиялық әлеуеті мен отбасы институтының берік негізде дамып жатқанын көрсетеді.

Көпбалалы аналар – тек ұрпақ тәрбиелеуші ғана емес, олар – қоғамның береке-бірлігін сақтаушы, ұлттық құндылықтарды жеткізуші, әлеуметтік тұрақтылықтың іргетасын қалаушы азаматтар. Мемлекет тарапынан көрсетіліп жатқан құрмет пен қолдау – аналардың еңбегін мойындап, мәртебесін нақты мойындаудың көрінісі. «Алтын алқа», «Күміс алқа» секілді марапаттар – мемлекеттік деңгейде аналарға көрсетіліп отырған жоғары сенім мен алғыстың айғағы. Бұл марапатты тек туу санына қарап емес, ұрпақ тәрбиесіндегі адал еңбек пен қоғамдық рөлге берілген баға деп түсіну қажет. Қазіргі кезеңде отбасы институты, әсіресе ана рөліне баса назар аудару – қоғамның рухани саулығын сақтаудың басты тетігі. Көпбалалы аналарға қолдау көрсету арқылы мемлекет демографиялық өсімді ынталандырады. Отбасы құндылықтарын сақтайды. Әлеуметтік әділеттілікті жүзеге асырады. Ұрпақ тәрбиесін сапалы деңгейге көтереді. Бүгін марапатталған аналар – ертеңгі ел тағдырын шешетін ұрпақты тәрбиелеп отырған тұлғалар.

Түркістанда өткен көпбалалы аналарды марапаттау рәсімі – ананың қоғамдағы орнына деген шынайы құрметтің, ұлттық рухты нығайтудың, ұрпақ тәрбиесін мемлекет мүддесіне сай жолға қоюдың көрнекті үлгісі. Ана – ұлттың тірегі, отбасының шырағы. Түркістанда анаға құрмет көрсету – тек дәстүрлі парыз емес, жүйелі мемлекеттік саясаттың ажырамас бөлігіне айналып отыр. Бұл – болашаққа нық сеніммен қарауға мүмкіндік беретін ізгі қадам.