«АШЫҚ ЕСІК КҮНІ» ХАЛЫҚ ПЕН БИЛІК АРАСЫНДАҒЫ СЕНІМДІ НЫҒАЙТАДЫ

Түркістан облысына қарасты Келес ауданында қоғамның құқықтық мәдениетін арттыруға бағытталған ерекше шара өтті. «Қоғамда заң мен тәртіп идеологиясын ілгерілету жөніндегі 2025–2030 жылдарға арналған тұжырымдама» аясында ұйымдастырылған «Ашық есік күні» акциясы азаматтарға тегін құқықтық көмек көрсетуге арналды. Бұл бастама – мемлекет пен халық арасындағы өзара сенімді күшейтуге, сондай-ақ «Халық үніне құлақ асатын мемлекет» қағидатын нақты іске асыруға бағытталған маңызды қадамдардың бірі.

Іс-шараны Келес ауданы әкімдігі мен Шымкент қаласы заң консультанттары палатасы бірлесе ұйымдастырды. Акцияның басты мақсаты – тұрғындардың құқықтық сауаттылығын арттыру, заң бұзушылықтың алдын алу және азаматтардың өз құқықтары мен міндеттерін толық білуіне жағдай жасау болды. Бұл – қоғамда әділдік пен заң үстемдігін орнатуға бағытталған мемлекеттік саясаттың бір бөлігі. Шараны Келес ауданының әкімі Жәнібек Ағыбаев ашып, сөз барысында құқықтық мәдениетті қалыптастырудың маңыздылығына ерекше тоқталды. «Әділдік пен тәртіп – мемлекет тұрақтылығының іргетасы. Азаматтардың құқықтық сауаттылығы артқан сайын қоғамдағы сенім де нығаяды. Сондықтан мұндай кездесулер – халық пен билік арасындағы байланыстың тиімді құралы», – деді әкім. Кездесу барысында Шымкент қаласы заң консультанттары палатасының төрағасы Оралбай Құдайберген тұжырымдаманың негізгі бағыттарымен таныстырып, оның мән-маңызына тоқталды. Ол құқықтық мәдениетті дамыту қоғамның рухани және әлеуметтік тұрақтылығына әсер ететінін айтып, «Халық үніне құлақ асатын мемлекет» қағидатының түпкі мақсаты да осы екенін атап өтті. «Мемлекет халықтың үнін естіп, оның мәселесін заң шеңберінде шешуге тырысқанда ғана әділ қоғам қалыптасады. Бұл жолда құқықтық ағарту жұмыстарының рөлі орасан», – деді ол өз сөзінде.

Акция аясында Шымкент қаласы мен Түркістан облысынан келген тәжірибелі заңгерлер Келес тұрғындарына тегін кеңес берді. Кездесуге келген азаматтар жер дауы, әлеуметтік төлемдер, еңбек қатынастары, кәсіпкерлік құқық, отбасы және неке қатынастары, алимент мәселесі сияқты түрлі тақырыптарда өз сұрақтарын қойды. Заңгерлер әрбір өтінішті жеке қарастырып, заң аясында шешу жолдарын түсіндірді. Тұрғындар үшін мұндай шараның пайдасы айқын болды. Көптеген азаматтар өздерін мазалап жүрген мәселелер бойынша нақты жауап алып, құқықтық тұрғыда қандай қадам жасау керектігін білді. Бұл – азаматтардың заң алдындағы сенімін арттырып қана қоймай, өз құқығын қорғаудың мәдениетін қалыптастыратын маңызды процесс. Акцияның тағы бір ерекшелігі – ашық форматта өткендігі. Тұрғындар заңгерлермен еркін пікір алмасып, құқықтық кеңестерді жеке жағдайда ғана емес, жалпы сипатта да талқылауға мүмкіндік алды. Бұл тәсіл адамдардың бір-бірінің тәжірибесінен үйренуіне, құқықтық сауаттылық деңгейін ұжымдық түрде арттыруға ықпал етті. Мұндай бастамалар қоғамда заң мен тәртіп идеологиясын нығайтумен қатар, азаматтардың билікке деген сенімін де арттырады. Президент Қасым-Жомарт Тоқаев ұсынған «Халық үніне құлақ асатын мемлекет» тұжырымдамасының өзегі – билік пен қоғам арасындағы ашық диалог орнату, әрбір азаматтың мәселесіне мән беру. Осы тұрғыдан алғанда, Келестегі «Ашық есік күні» – халықтың үнін естіп, оның мұң-мұқтажына құқықтық тұрғыдан жауап беру мәдениетінің нақты үлгісі болды.

Бүгінде мемлекет азаматтардың құқықтық мәдениетін көтеруді стратегиялық бағыт ретінде қарастырып отыр. Себебі, құқықтық сауаты жоғары қоғам – тұрақты мемлекеттің кепілі. Азамат өз құқығын біліп, заңды талап ете білсе, әділдік пен тәртіп те орнығады. Бұл қағиданы жергілікті билік органдары мен азаматтық қоғам өкілдері нақты іспен дәлелдеп отыр. Акцияның қорытындысында аудан әкімі Жәнібек Есенұлы мен заң консультанттары палатасының төрағасы Оралбай Бижанұлы тұрғындарға алғысын білдіріп, мұндай шаралар алдағы уақытта да тұрақты түрде өткізілетінін айтты. Олар қоғамның құқықтық мәдениетін көтеру – үздіксіз процесс екенін, сондықтан тұрғындармен ашық әрі тұрақты байланыс орнату жалғасатынын атап өтті. Мұндай форматтағы кездесулердің тиімділігі көп қырлы. Біріншіден, ол тұрғындарға нақты құқықтық қолдау көрсетеді. Екіншіден, билікке азаматтардың шынайы проблемаларын анықтап, оларды шешудің заңды жолдарын ұсынуға мүмкіндік береді. Үшіншіден, қоғамда әділдік пен заң үстемдігі идеясын қалыптастырады. Бұл – қазіргі мемлекеттік саясаттың басты бағыты.

Келестегі «Ашық есік күні» акциясы тек құқықтық көмек көрсету емес, халық пен билік арасындағы ашық әрі сенімді қатынастың орнауына жол ашқан іс-шара болды. Мұнда айтылған әрбір сұрақ, берілген әр кеңес – азаматтық қоғамның дамуына, ал мемлекет пен халықтың серіктестік негізінде әрекет етуіне қосылған үлес. Қорытындылай келгенде, Келес ауданында өткен бұл акция – «тыңдайтын мемлекет» қағидатын іс жүзінде жүзеге асырып отырған нақты мысалдардың бірі. Мұндай шаралар жиі әрі жүйелі түрде өткізіліп тұрса, қоғамдағы құқықтық мәдениет пен әділдікке деген сенім артып, азаматтардың мемлекетке деген көзқарасы да нығая түспек.