ҚАШАҒАН КЕН ОРНЫ АШЫЛҒАЛЫ 115 МЛН ТОННА МҰНАЙ ӨНДІРІЛДІ

«Норт Каспиан Оперейтинг Компани Н.В.» ЖШС (NCOC) басқарушы директоры Джанкарло Рую Қашаған кен орнындағы компания жұмысы туралы айтып берді.

Бүгін Мәжілістің Экология мәселелері және табиғат пайдалану комитеті Солтүстік Каспий (Қашаған) жобасы бойынша елішілік құндылықты дамыту және отандық өндірушілерді қолдау мәселесін қарап жатыр.

− Қашаған кен орны іске қосылған сәттен бастап, 115 миллион тоннадан астам экспорттық мұнай, 70 миллиард текше метрден астам газ және 10 миллион тоннадан астам күкірт өндірілді, — деді Джанкарло Рую Мәжілісте өткен дөңгелек үстелде.

Оның айтуынша, соңғы бірнеше жылда ауқымды жұмыстар атқарылды.

– Біз өте маңызды жабдықты ауыстырдық. Жалпы, кен орнындағы жұмыс қауіпсіз жүріп жатыр, ешқандай ауыр жарақаттар мен оқыс оқиғалар тіркелген жоқ. Түрлі формадағы жергілікті қамтуға – тауарлар, жұмыстар мен көрсетілетін қызметтерге шамамен 18 миллиард доллар бағыттадық. 2024 жылға келсек, шамамен миллиард доллар жергілікті қамтуға жұмсалды, – деп толықтырды компания өкілі.