«ШЕКСІЗ ӨНЕР – ТЕҢ МҮМКІНДІКТЕР ӘЛЕМІ» АТТЫ ТЕАТРЛАНДЫРЫЛҒАН ШОУ ӨТТІ

Түркістан қаласында алғаш рет ерекше қажеттіліктері бар балалардың қатысуымен «Шексіз өнер – тең мүмкіндіктер әлемі» атты театрландырылған шоу ұйымдастырылды. Шараны Түркістан қаласы әкімдігінің Жұмыспен қамту және әлеуметтік бағдарламалар бөлімі қолға алып, қоғамда инклюзияны нығайту мен әлеуметтік теңдік қағидаларын ілгерілетуге бағытталған бастаманы жүзеге асырды.

Шараның басты мақсаты – ерекше қажеттіліктері бар балалардың шығармашылық қабілеттерін дамыту, олардың талантын ашып, мәдени ортаға бейімдеу арқылы қоғаммен байланысын күшейту. Түркістан қаласының ерекше мәртебесіне сай бұл бастама инклюзивті қоғам құру жолындағы маңызды қадам ретінде бағалануда. Жоба тек өнер көрсету алаңы ғана емес, сонымен бірге балалардың ішкі әлеуетін танып-білуге, олардың қоғамға бейімделуіне және өз қабілетін еркін көрсетуге мүмкіндік беретін бірегей алаңға айналды. Іс-шара аясында Түркістан өңірінен келген ерекше балалардың қолөнер бұйымдары қойылған көрме ұйымдастырылды. Ұлттық нақыштағы кестелер, мүсіндер, қолдан жасалған бұйымдар мен түрлі шығармашылық жұмыстар көпшілік назарына ұсынылды. Бұл көрме – балалардың тек шығармашылықпен ғана емес, ұлттық өнерге деген сүйіспеншілікпен де тәрбиеленіп келе жатқанын көрсетті. Кештің шарықтау шегі – мюзикл жанрындағы театрландырылған финалдық қойылым болды. Қойылымға 40-қа жуық бала қатысып, көрерменге өз өнерін паш етті. Ерекшелігі – дайындық процесі кәсіби мамандардың жетекшілігімен жүргізілді. Бұл балалардың сенімді сахнаға шығуына және өз шығармашылық мүмкіндіктерін толық ашуына үлкен әсер етті. Көрермендер ерекше балалардың шынайы эмоциясы мен шабытын сезініп, рухани әсер алып қайтты. Қойылым арқылы баланың тек дене мүмкіндігі емес, рухани әлемі мен жүрек жылуы маңызды екені тағы бір мәрте дәлелденді.

Бұл жобаның негізгі құндылықтары мыналарға негізделеді — қоғамдағы ерекше балаларға деген көзқарасты өзгерту, инклюзивті орта мен толеранттылықты нығайту, балалардың шығармашылық әлеуетін дамыту, ұлттық өнер мен қолөнерді дәріптеу, кәсіби мамандардың сүйемелдеуімен сапалы шығармашылық орта қалыптастыру. Шараның ұйымдастырушылары бұл бастама алдағы уақытта да жалғасып, дәстүрлі жобалардың біріне айналатынына сенімді. «Шексіз өнер – тең мүмкіндіктер әлемі» – бұл тек өнер кеші ғана емес, бұл – ерекше жандардың жүрегінен шыққан сенім мен шабыттың, төзім мен табандылықтың көрінісі. Түркістан қаласы осы арқылы инклюзивті қоғам құру жолында тағы бір нақты қадам жасады. Мұндай жобалар балалардың өмірін жарқын етіп қана қоймай, тұтас қоғамға да ізгілік пен түсіністік дәнін себеді.