ТҰРҒЫНДАРДЫҢ ТАЛАП-ТІЛЕКТЕРІ ЕСКЕРУСІЗ ҚАЛМАЙДЫ

Түркістан облысы, Сарыағаш ауданының әкімі Арман Абдуллаевтың тұрғындармен кезекті кездесуі Қабланбек ауылдық округінде өтті. Бұл жүздесу – аудан басшысының халықпен ашық форматтағы кездесулерін жалғастыру мақсатындағы жоспарлы шаралардың бірі. Кездесудің басты мақсаты – тұрғындардың өтініш-тілектерін тыңдап, елді мекендердің әлеуметтік-экономикалық дамуы бағытындағы өзекті мәселелердің шешілу барысын талқылау.

Кездесуден бұрын аудан әкімі азаматтарды жеке қабылдап, олардың өтініштері мен ұсыныстарын жеке-жеке қарады. Әрбір тұрғынның мәселесіне мән беріліп, шешу жолдары заң аясында түсіндірілді. Бұл – жергілікті биліктің «Халық үніне құлақ асатын мемлекет» қағидаты аясында жұмыс істеп келе жатқанының нақты көрінісі. Арман Абдуллаев кездесу барысында аудан бойынша атқарылып жатқан жұмыстардың нәтижелеріне тоқталып, алдағы уақытта жүзеге асырылатын жоспарларды егжей-тегжей баяндады. Ол өз сөзінде «Сіздердің әрбір өтініштеріңіз назарға алынып, алдағы уақытта бюджеттің мүмкіндігіне қарай тиісті жұмыстар атқарылатын болады» деп атап өтті. Әкімнің айтуынша, тұрғындар көтерген барлық мәселе кезең-кезеңімен қарастырылып, заң талаптарына сай шешімін табады. Бұл бағыттағы жұмыстардың басты мақсаты – халықтың тұрмыс сапасын жақсарту және ауылдық жерлердегі өмір сүру деңгейін арттыру. Қабланбек ауылдық округіне қарасты елді мекендерде соңғы уақытта бірқатар инфрақұрылымдық және әлеуметтік жобалар жүзеге асырылуда. Атап айтқанда, Жонарық елді мекеніндегі Қошқарбек ата және Ж.Ешеев көшелеріне 18 дана түнгі жарықшам орнатылды. Бұл жұмыстар ауыл көшелерінің жарықтандырылу деңгейін арттырып, тұрғындардың қауіпсіздігін қамтамасыз етуге мүмкіндік берді. 2025 жылдың мамыр айында аудан бюджетінен қаржы бөлініп, Ташқұлақ су тазалау насос станциясына цеолитті фильтр орнатылды. Бұл – таза ауыз су сапасын арттыруға бағытталған маңызды қадамдардың бірі. Аталған станциядан Ақниет елді мекеніндегі 1000 м³ көлеміндегі су жинақтау қоймасына су жеткізіліп, Қанағат, Ақниет және Жонарық елді мекендерінің тұрғындары таза ауыз сумен тұрақты қамтылуда. Бұл жоба ауыл халқының көптен күткен қажеттілігін өтеп, тұрмыс сапасын айтарлықтай жақсартты.

Цифрлық инфрақұрылымды дамыту бағытында да айтарлықтай жұмыстар жүргізілуде. Жонарық елді мекенінде «Kcell» ұялы байланыс операторының 4G стандартымен жаңа базалық станциясы орнатылып, іске қосылды. Бұл ауыл тұрғындары үшін заманауи байланыс сапасын арттыруға және интернет жылдамдығын жақсартуға мүмкіндік берді. Қанағат елді мекенінің Қанағат және Ж.Ешеев көшелеріне аяқжол төселіп, тұрғындардың қозғалысы жеңілдеді. Жаяу жүргіншілерге арналған тротуарлардың салынуы – ауылдың көркін арттырып қана қоймай, жол қозғалысы қауіпсіздігін де күшейтті. Ал Қабланбек елді мекенінде Ж.Борашов, Тәуелсіздіктің 20 жылдығы және М.Мақатаев көшелеріне 38 дана түнгі жарықшам орнатылды. Бұл – елді мекеннің түнгі келбетін өзгертіп, жарық әрі қауіпсіз орта қалыптастырды. Ауылдық округтің спорт және бос уақыт инфрақұрылымына да көңіл бөлінуде. Ақниет елді мекенінде ашық стадион мен воркаут алаңы салынды. Бұл нысандар жастардың спортпен шұғылдануына, дене шынықтыру мәдениетін қалыптастыруға зор мүмкіндік беріп отыр. Сонымен қатар, Ташқұлақ және Сіргелі елді мекендерінде балалар ойын алаңшаларының құрылысы жүргізіліп, тұрғындар игілігіне берілді. Ал Зах елді мекенінде ашық волейбол алаңы мен балалар ойын алаңшасы салынып, пайдалануға берілді. Мұндай жобалар ауыл тұрғындарының бос уақытын тиімді өткізуіне, әсіресе балалар мен жастардың белсенді өмір салтын ұстануына жағдай жасайды.

Инженерлік және ирригациялық жүйелерді жақсарту бағытында да нақты нәтижелер бар. Ауылдық округ аумағында орналасқан «Р-14» каналының 11 шақырымы, «Хожахан» каналының 9 шақырымы, «Қараменді» қашыртқысының 1 шақырымы және «Қағанат» қашыртқысының 2 шақырымдық бөлігі механикалық тазалаудан өтті. Бұл жұмыстар егін шаруашылығын дамытуға және су өткізу қабілетін арттыруға оң әсер етті. Сонымен қатар, Сіргелі елді мекеніне қарасты Қызқұдық көшесінде орта жөндеу, аяқжол және суағар (лоток) құрылысы жүргізілуде. Бұл жоба ауылдың инфрақұрылымдық жағдайын айтарлықтай жақсартпақ. Бұған қоса, М.Есқұлов және Д.Спанов көшелеріне жалпы ұзындығы 2,5 шақырым асфальт жамылғысы төселіп жатыр. Бұл жұмыстарды «Bairkum Company» жауапкершілігі шектеулі серіктестігі жүргізуде. Жол инфрақұрылымының жақсаруы – ауыл тұрғындарының өмір сапасын арттырудың және экономикалық белсенділігін күшейтудің маңызды факторы. Кездесуде тұрғындар өз ұсыныстарын білдіріп, бірқатар мәселелерді ортаға салды. Аудан әкімі олардың әрқайсысына жеке тоқталып, жауапты бөлімдерге нақты тапсырмалар берді. Әкімнің айтуынша, ауылдық округтердің өркендеуі тек мемлекеттік қолдауға ғана емес, жергілікті қауымдастықтың белсенділігіне де байланысты. Сондықтан тұрғындардың әрбір ұсынысы мен пікірі алдағы даму жоспарларына енгізіледі.

Қабланбек ауылдық округі соңғы жылдары айтарлықтай өзгерістерге ұшырап келеді. Ауыл келбеті жаңарып, жаңа нысандар бой көтеруде. Тұрғындардың өмір сапасын арттыруға бағытталған мұндай жобалар халықтың сенімін нығайтып, жергілікті билік пен қоғам арасындағы өзара байланысты күшейтеді. Қорыта айтқанда, Қабланбек ауылдық округінде атқарылып жатқан жұмыстар – мемлекет тарапынан ауылдық аймақтарды дамытуға бағытталған саясаттың нақты көрінісі. Инфрақұрылымдық жобалар мен әлеуметтік нысандардың көбеюі, спорт және демалыс алаңдарының салынуы – ауыл өмірінің жаңа деңгейге көтерілгенін айғақтайды. Ал аудан басшысының тұрғындармен ашық кездесуі мен жеке қабылдауы — халықтың үніне құлақ асудың және ел сенімін ақтаудың айқын үлгісі болып отыр.