АППАРАТ ОТЫРЫСЫ: ӨЗЕКТІ МӘСЕЛЕЛЕР ҚАРАЛДЫ

Қалалық Төтенше жағдайлар департаментінің бастығы Тілеуберді Мәдиевтің мәліметінше, биылғы бірінші жарты жылдықта 28 кәсіпорын тексеріліп, өрт қауіпсіздігі талаптарын бұзудың 364 фактісі анықталған. Сонымен қатар, 8 сауда-ойын-сауық нысаны мен 11 базарда профилактикалық бақылау жүргізілді. Есепті кезеңде қалада 212 өрт тіркелген. Бұл өткен жылдың сәйкес кезеңімен салыстырғанда 55 жағдайға аз. Өрттің негізгі себептері – электр жабдықтарын пайдалану талаптарының бұзылуы, электр желілерінің шамадан тыс жүктелуі, технологиялық процестердің сақталмауы және отпен абайсыз жұмыс істеу. Сонымен қатар, электр желісі мен жабдықтарының техникалық жағдайына, өрт қауіпсіздігі талаптарының сақталуына, эвакуациялық жолдардың талапқа сай болуына және өрт болған жағдайда қызметкерлердің әрекет етуге дайындығына ерекше назар аударылды.

Тұрғын үй басқармасы басшысының міндетін атқарушы Көпжан Төлебаевтың айтуынша, қаладағы баспана қорында көп қабатты 2 595 үй бар. Соңғы үш жылда 71 үйге күрделі жөндеу жүргізіліп, 38 үйдегі 55 лифт ауыстырылды. Биыл 31 үйде жөндеу басталып, 19 нысанда тиісті жұмыстар аяқталды, қалған 12 үйдегі жөндеу жұмысын жыл соңына дейін аяқтау жоспарлануда. Тұрғындардың өтініштері ескеріле отырып, келесі жылға 26 үйдегі 37 лифтіні ауыстыру, көп қабатты 31 үйді жөндеуге жобалық-сметалық құжаттама әзірлеу жоспарланған. Қасбеттер мен шатырларды жаңартуға да ерекше көңіл бөлінуде. Қаланың бірыңғай сәулеттік келбетін қалыптастыру аясында көп қабатты 65 үйдің техникалық жағдайы зерттелді. Дизайн-код бекітілгеннен кейін қасбеттерді, шатырларды, жарнама конструкцияларын және ғимараттардың сыртқы келбетіне әсер ететін өзге де элементтерді жаңарту бойынша тиісті шаралар айқындалады.

Балалардың құқықтарын қорғау басқармасының басшысы Мөлдір Кеуенова басқарма тарапынан 772 мемлекеттік қызмет көрсетіліп, азаматтардың 133 өтініші қаралғанын хабарлады. Мамандар кәмелетке толмағандардың құқығын қорғауға қатысты 106 сот отырысына қатысты. Сондай-ақ, «111» байланыс желісіне келіп түскен 27 хабарлама бойынша жұмыс жүргізілді. Ата-ана қамқорлығынсыз қалған және өмірлік қиын жағдайға тап болған балаларға ерекше көңіл бөлінуде. Кәмелетке толмағандарды бейімдеу орталығына 92 бала орналастырылып, олардың 70-і тиісті жұмыс жүргізілгеннен кейін отбасыларына қайтарылды. Тағы 8 бала арнайы әлеуметтік қызметтерге мұқтаж балаларды қолдау орталығына жіберілді. Балалардың қараусыз қалуының, еңбекке тартылуының, қайыр сұрауының және кәмелетке толмағандардың түнгі уақытта заңды өкілдерінсіз жүруінің алдын алу бойынша профилактикалық рейдтер жалғасуда. 1 қыркүйектен бастап ведомствоаралық жұмыс тобы білім беру ұйымдарына мониторинг жүргізіп, алдын алу жұмысын жалғастырады. Кеңесті қорытындылаған қала әкімі өрт қауіпсіздігі талаптарының сақталуын бақылауды күшейтуді, көп қабатты үйлерді жөндеу жұмысын уақтылы аяқтауды және балалардың құқықтары мен қауіпсіздігін қамтамасыз ету бағытындағы ведомствоаралық жұмысты күшейтуді тапсырды.