АУЫЛ САНЫ НЕГЕ ТОҚТАУСЫЗ АЗАЙЫП ЖАТЫР?

Ұлттық экономика министрінің орынбасары Бауыржан Омарбеков Мәжілістегі дөңгелек үстелде елдегі ауылдардың саны неге тоқтаусыз азайып жатқанын айтты.

— 2025 жылдың 1 қаңтарындағы жағдай бойынша 6147 ауыл бар. Онда 7,5 миллионнан астам халық өмір сүріп жатыр. Ауыл халқының саны 38,4 пайыз көлемінде. Ауылдардағы жұмыссыздық деңгейі 4,7 пайыз болды. Ал өзін-өзі жұмыспен қамтып отырғандардың үлесі — 33 пайыз, — деді вице-министр.

Сондай-ақ, ол кей ауылдардың жабылуына объективті себептер әсер еткенін атап өтті.

— Ауыл санына қатысты айтсақ, иә, ауылдар санының азаюы орын алып отыр. Соңғы 5 жылдың ішінде 194 ауыл жабылды. Оның объективті себептері де бар. Мысалы, Алатау қаласы құрылған кезде маңындағы 12 ауылдық елді мекен құрамына кіріп кетті. Жалпы негізгі статистика сол, 194 ауыл жабылды, — деді Бауыржан Омарбеков.