КӨШПЕЛІ ҚОҒАМДЫҚ ҚАБЫЛДАУДА ТҰРҒЫНДАРДЫҢ ТАЛАП-ТІЛЕГІ ТЫҢДАЛДЫ

Түркістан облысының Сарыағаш ауданында «AMANAT» партиясының мобильді көшпелі қоғамдық қабылдауы өз жұмысын жалғастырды. Бұл жолғы қабылдау Жартытөбе ауылдық округіне қарасты Құрама елді мекенінде ұйымдастырылды. Спорт кешенінде өткен шарада облыстық департаменттер мен басқармалардың жауапты өкілдері, прокуратура және құқық қорғау органдарының қызметкерлері, кәсіби заңгерлер мен адвокаттар, жеке сот орындаушылары мен медиаторлар, сондай-ақ су, газ, электр энергиясымен қамтушы ұйымдардың өкілдері мен банк қызметкерлері тұрғындардың талап-тілегін тыңдады.

Облыс орталығынан шалғайда жатқан ауыл тұрғындарының мәселесін орнында шешу — «AMANAT» партиясының басты қағидаты. Партияның Түркістан облыстық филиалының төрағасы, облыстық мәслихаттағы фракция жетекшісі Алтынсары Үмбетәлиевтің айтуынша, халықпен тікелей жүздесу, олардың үнін есту — партия қызметінің өзегіне айналған. «Халықтың мұң-мұқтажын алыстан емес, жақыннан тыңдау – біздің басты қағидамыз», — деген Алтынсары Дүйсенбекұлы мұндай қабылдаулардың өңір тұрғындарына нақты көмек беретінін атап өтті. Оның сөзінше, жыл басынан бері облыс көлемінде 345 көшпелі қабылдау өткізіліп, 3844 азаматтың өтініші тыңдалған. Солардың 2300-ге жуығы оң шешімін тапқан. Барлығы 13 мыңға жуық өтініш тіркеліп, оның сегіз жарым мыңы шешімін тапса, қалған 4345 өтініш бойынша заң аясында кеңес берілген. Бұл көрсеткіштер партияның «Халық үніне құлақ асатын мемлекет» қағидатына адалдығын айқын дәлелдейді. Президент Қасым-Жомарт Тоқаев ұсынған бұл тұжырымдаманың өзегі – билік пен қоғам арасындағы сенімге негізделген байланыс орнату. Партияның бастамасымен өткізіліп жатқан көшпелі қабылдаулар осы идеяны нақты іске асырудың тиімді құралына айналды.

Қабылдауға келген тұрғындар ауылдағы өмір сапасына тікелей әсер ететін мәселелерді көтерді. Электр қуатының сапасы төмендігі, ауылішілік жолдардың жарамсыздығы, қараусыз қалған инженерлік құдықтардың мал мен адам өміріне қауіп төндіруі, ауыз су жүйелерінің тозуы — халықты мазалап отырған негізгі проблемалар. Тегісшіл ауылында жаңа мектеп салу қажеттілігі де назарға алынды. Денсаулық сақтау саласы бойынша тұрғындардың өтінішін Түркістан облыстық денсаулық сақтау басқармасының басшысы Асхан Байдувалиев тыңдады. Ол ауылдарға жаңа фельдшерлік-акушерлік пункттер (ФАП) салу, аудандық аурухананы заманауи медициналық құрал-жабдықтармен қамтамасыз ету, санитарлық көліктер паркін жаңарту мәселелерін қарастыруға уәде берді. Сондай-ақ мүгедектікті тану және дәрігерлік көмекке қолжетімділікті арттыру бағытында ұсыныстар жинақталды. Білім беру саласындағы сұрақтарға облыстық білім басқармасы басшысының міндетін атқарушы Жандос Нұрпейісов жауап берді. Ол педагог кадрлардың біліктілігін арттыру, мектептерді күрделі жөндеуден өткізу, жаңа білім ошақтарын салу және жекеменшік мектептерді қаржыландыру мәселелерін түсіндіріп өтті. Оның айтуынша, қазіргі таңда Сарыағаш ауданында демографиялық өсім жоғары болғандықтан, білім нысандарына деген сұраныс та артып келеді.

Сарыағаш ауданы — Түркістан облысындағы халқы ең көп шоғырланған аймақтардың бірі. Соңғы жылдары мұнда жаңа елді мекендер мен тұрғын алаптар пайда болып, инфрақұрылымдық жүктеме артты. Ауданның ерекшелігі — жылыжай шаруашылықтарының көптігі мен ауыл шаруашылығының дамығандығы. Дегенмен, жаңа аумақтардың жол, су, электр, инженерлік жүйелер мәселесі өзекті күйінде қалып отыр. Осы тұрғыда партия мен жергілікті әкімдік тығыз байланыста жұмыс атқарып, нақты шешімдер қабылдауға күш салуда. «AMANAT» партиясының көшпелі қоғамдық қабылдауы – жай ғана кездесу емес, азаматтар мен билік арасындағы тиімді диалог алаңы. Мұнда тұрғындар өз мәселесін ашық айтып, бірден жауап алу мүмкіндігіне ие. Бұл тәжірибе халық сенімін арттырудың және әлеуметтік әділдік орнатудың пәрменді құралына айналып отыр. Партия төрағасы атап өткендей, әрбір көтерілген мәселе тіркеліп, бақылауға алынады. Әкімдік пен тиісті басқармалар нақты жауапкершілік жүктеліп, шешімдерге дейінгі кезең партия тарапынан мониторингке алынған. Бұл тәсіл биліктің есеп беру мәдениетін қалыптастырып, азаматтардың мемлекеттік органдарға деген сенімін күшейтеді.

«Халық үніне құлақ асатын мемлекет» қағидатын жүзеге асырудың басты жолы – осындай тікелей диалог алаңдарын көбейту. Сарыағаштағы қабылдау осы ұстанымның өңірлік деңгейде сәтті іске асып жатқанын көрсетті. Мұнда айтылған әр өтініш — жай ғана статистикалық мәлімет емес, нақты адамның тағдыры, оның өмір сапасын жақсартуға бағытталған қадам. Бүгінде «AMANAT» партиясы Түркістан облысының ең шалғай ауылдарына дейін жетіп, жергілікті халықтың проблемасын билікке жеткізудің тиімді көпіріне айналды. Бұл жұмыс қоғамдағы сенім атмосферасын нығайтып, мемлекеттік саясаттың адам мүддесіне бағытталғанын дәлелдейді. Қорытындылай келгенде, Сарыағаштағы көшпелі қабылдау – елдің саяси мәдениетінде жаңа дәстүр қалыптастырып жатқан маңызды іс-шара. Мұнда халықтың дауысы естіледі, уәжі назарға алынады, ал шешім қабылдау процесі ашық әрі әділ жүргізіледі. Мұндай тәжірибелер еліміздегі «тыңдайтын мемлекет» моделінің нақты жүзеге асып жатқанын көрсетіп отыр.