САУЛЫҚ — САҚТЫҚТА: АҚ ХАЛАТТЫЛАР ТЫҢ АҚПАРАТТАРМЕН БӨЛІСТІ

Денсаулық сақтау саласының өзіндік атаулы күндері бар. Бұл — әлемдік деңгейде түрлі ауруларға назарды аударту үшін жасалатын шаралардың бірі десек, артық айтқанымыз емес. Мәселен, жыл сайын ақ халаттылар туберкулезге немесе СПИД-ке қарсы атаулы күндерді атап өтеді. Яғни бұл күндері түрлі медициналық мекемелерде ашық есік күндері ұйымдастырылады. Түрлі челлендждер таралады. Басты мақсат – аталған ауру түрінің алдын алу мен оқыс оқиға орын алғанда қалай әрекет ету керегін қоғамға насихаттау. Бұл бағытта Түркістан қаласының дәрігерлері тарапынан ұйымдастырылып жатқан шаралар аз емес. Мәелен, Дүниежүзілік денсаулық сақтау ұйымы 5 мамырды Дүниежүзілік қол гигиенасы күні деп жариялағаны белгілі. Осы орайда, Түркістан қалалық емханасының дәрігерлері мен мейірбикелері арнайы бейнежазба жариялап, қол гигиенасы турасындаи кеңінен ақпарат берді.

«Дүниежүзілік қол гигиенасы күні, біз сіздерді бірнеше секунд уақытыңызды бөліп, қолыңызды жууға шақырамыз. Өйткені қолдың тазалығы – бұл вирустар мен бактериялардан қорғау ғана емес, сонымен қатар олардың таралуын болдырмайды. Қол гигиенасын сақтау – медициналық көмекке байланысты инфекциялардың таралуын болдырмаудың оңтайлы тәсілі. Бұл бір қарағанда қарапайым әрекет, бірақ оны медициналық мамандар арасында сақтамау бүкіл әлемде проблема болып табылады. Гигиена мәселесі бір адамның ғана проблемасы бола алмайды, оның қалауына қарамастан, ол отбасында, әріптестерінің арасында, сыныпта немесе балабақшадағы топта ауыр аурулардың (көбінесе жұқпалы) таралуына себепші болуы мүмкін. Сондықтан стандартты алдын-алу шараларын сақтау — инфекцияның алдын-алудың қарапайым және тиімді әдістерінің бірі болып саналады» дейді шараны ұйымдастырушылар.

Айта кетуіміз керек, саулық сақтықтан басталады. Қолды жуу — бұл медицина тілімен айтқанда процедура, оның міндеті-қолымызды шамадан тыс микроорганизмдерден тазарту. Оны тамақтанар алдында және тамақ дайындамас бұрын, жануарлармен байланыста болғаннан кейін, дәретханадан кейін, сондай-ақ қоғамдық орындарға барғаннан кейін жүргізу керек. Оны жуудың да талаптары бар. Мәселен, қолды ылғалдандырғаннан кейін, оларды мұқият сабындап, сүртеді. Бұл процедура кесінде 15 секунд болуы тиіс. Бұл жағдайда қолдың барлық аймақтарына, яғни алақанның артқы және ішкі жақтарына, саусақтардың арасына, саусақтардың өздеріне, тіпті тырнақтарына назар аудару керек. Жуу кезінде көбік қаншалықты көп пайда болса, соғұрлым жақсы. Сабынды теріге жай ғана өткізіп, содан кейін шаю жеткіліксіз. Қолды жуар алдында зергерлік бұйымдарды алып тастаған дұрыс, өйткені микроорганизмдер олардың астында да жиналады. Қолды жуғаннан кейінгі проблемалық пункттер — кранды сөндіру және қолды сүрту. Кранда бактериялар көп болғандықтан, қоғамдық орындарда оны сөндіру үшін салфетканы пайдаланған дұрыс, ал үйде кранның тазалығын бақылау жеткілікті. Ал сүрту үшін құрғақ және таза сүлгіні пайдалану керек. Бактерияға қарсы сабынның әдеттегіден еш айырмашылығы жоқ, бірақ сонымен бірге ол теріге зиян тигізуі мүмкін. Сондықтан кәдімгі сабынды қолданған дұрыс-ол өз функцияларын өте жақсы орындайды. Тағы бір кеңес, теріңіз үшін ең қолайлы гигиеналық құралдарды таңдаңыз. Мұндай жағдайда сіз денсаулығыңызға қатысты көптеген проблемалардан сақтанып қана қоймай, қолыңыздың терісін де сақтай аласыз. Қолды үнемі жуу қоғамдық орындарға барғаннан кейін жұқпалы ауруды жұқтыру ықтималдығының айтарлықтай төмендетеді. Инфекциялардың көліктегі тұтқалар, есік тұтқалары, ақша және өзге де қарапайым тауарлар арқылы жұғуы мүмкін екенін ұмытпаған абзал.