ТҮРКІСТАН ҚАЛАСЫНДА КӨПҚАБАТТЫ ҮЙЛЕРДІҢ САПАСЫНА БАҚЫЛАУ КҮШЕЙТІЛДІ

Түркістан қаласының әкімі Әзімбек Пазылбекұлының төрағалығымен өткен арнайы жиында тұрғын үйлердің сапасына қатысты мәселе күн тәртібінің басты тақырыбына айналды. Қала әкімдігі тарапынан соңғы уақытта тұрғындардан түскен арыз-шағымдардың артуы, сондай-ақ тұрғын үйлерді аралау барысында анықталған олқылықтар әкімдіктің бұл салаға ерекше көңіл бөлуіне себеп болды.

Жиынға қатысқан құрылыс, сәулет және құрылыс сапасын бақылау саласының мамандары, сонымен қатар бірқатар мердігер мекемелердің өкілдері (соның ішінде «Дос и К сервис», «Ақ Нұр-строй», «Азим строй», «Саха — 2005», «Талап строй» және «Ару — ТАМ» ЖШС) нақты сын мен талаптың нысанасына ілікті. Қала басшысы әрбір мекеменің жауапты нысандарында орын алған құрылыс сапасына қатысты ақауларды тізбелеп, олардың себебі мен салдарына назар аудартты. Кейбір көпқабатты үйлерде жарық желілерінің істен шығуы, жылу және су жүйелеріндегі ақаулар, ғимараттың ішкі әрлеу жұмыстарының сапасыз орындалуы тұрғындардың наразылығын тудырған. Мұндай келеңсіздіктер тек тұрғындардың тұрмысын қиындатып қана қоймай, қаладағы жалпы құрылыс мәдениетіне көлеңке түсіретіні анық. Қала әкімі Әзімбек Пазылбекұлы жиын барысында мердігер ұйымдарға нақты талаптар қойып, жақын арада кемшіліктердің толық ретке келтірілуі тиіс екенін қадап айтты. Бұл талап тек сөз жүзінде емес, нақты бақылау мен жауапкершілік тетіктері арқылы жүзеге асады. «Әрбір құрылыс компаниясы өз жұмысының сапасына толықтай жауап береді. Егер талапқа сай келмеген жағдайлар тағы да тіркелсе, жауапты тарапқа заң аясында қатаң шара қолданамыз. Тұрғындардың арыз-шағымы — біз үшін негізгі көрсеткіш», — деді қала басшысы. Сонымен қатар, салаға жауапты бөлім басшыларының да жұмысы қатаң бақылауда болады. Қалалық әкімдік тұрғындардың сенімін сақтау үшін тұрақты мониторинг жүргізу, орын алған олқылықтарды тез арада жою, алдағы уақытта осындай қателіктерге жол бермеу сияқты бағыттарды алға қойып отыр.

Бүгінгі таңда Түркістан қаласында 420 көпқабатты тұрғын үй бар. Бұл — бір жағынан өңірдегі урбанизация қарқынының жоғары екенін көрсетсе, екінші жағынан тұрғын үй құрылысына қойылатын талаптың да соған сәйкес жоғарылауын қажет етеді. Соңғы жылдары Түркістан жаңғырып, сәулеті мен инфрақұрылымы дамыған шаһарға айналып келеді. Алайда бұл өзгерістер сапасыз құрылыспен ұштаспауы тиіс. Қала тұрғындарының қауіпсіздігі мен өмір сүру сапасы әкімдік үшін басым бағыттардың бірі болып қала бермек. Түркістан қаласында тұрғын үй сапасына қатысты өткір мәселелер ашық түрде талқыланып, нақты шешімдер қабылдануда. Қала әкімінің араласуы — бұл мәселенің жай ғана әкімшілік деңгейде емес, қоғамдық маңызы бар проблемаға айналғанын көрсетеді. Әкімдіктің ұстанымы — «мәселелерді жасыру емес, оларды анықтап, шешу». Бүгінгі сын — ертеңгі сапа кепілі. Егер әкімдік пен мердігер мекемелер арасында жауапкершілік пен ашықтық қалыптасса, Түркістандағы тұрғын үйлер шын мәнінде жайлы әрі сенімді баспаналарға айналары анық.