ТӘУКЕ ХАН ДАҢҒЫЛЫ ЖАҢАРЫП, ЖОЛ САПАСЫ ЖАҢА ДЕҢГЕЙГЕ КӨТЕРІЛДІ

Түркістан қаласының көлік қатынасы мен инфрақұрылымдық дамуының маңызды нүктелерінің бірі саналатын Тәуке хан даңғылы толықтай жөндеуден өтті. Жалпы ұзындығы 5,1 шақырымды құрайтын бұл негізгі магистраль Абылай хан көшесінің қиылысына дейін жаңартылып, тұрғындар мен көлік жүргізушілері үшін жайлы әрі қауіпсіз қозғалыс аймағына айналды.

Жол жөндеу жұмыстары заманауи құрылыс стандарттары мен технологияларына сай жүргізілді. Атап айтқанда, ескі асфальт арнайы техникамен толықтай қопарылып, алынып тасталды. Орнына ірі және ұсақ түйіршікті жаңа асфальт қабаты төселді. Асфальттың сапасы мен беріктігіне қатаң техникалық бақылау жүргізілді. Құрылыс процесі жолдың ұзақ мерзімді қызмет етуін қамтамасыз ету мақсатында ұйымдастырылды. Бұл – тек ағымдағы жөндеу емес, жолдың құрылымын қайта жаңарту арқылы жүргізілген кешенді жұмыс екенін көрсетеді. Жолдың жамылғысын жаңартумен қатар, жол қозғалысы қауіпсіздігін арттыру бағытында да маңызды шаралар атқарылды. Тарқатсақ, Тәуке хан даңғылы бойындағы барлық жол белгілері жаңартылды. Қиылыстар мен кірме жолдарға қосымша жөндеу жұмыстары жүргізілді. Жол бойындағы көлік ағынына ыңғайлы әрі қауіпсіз инфрақұрылым қалыптастырылды. Бұл өзгерістер тұрғындардың өмір сапасын арттырумен қатар, жол-көлік оқиғаларының алдын алуға мүмкіндік береді. Тәуке хан даңғылы – Түркістанның тарихи ғана емес, стратегиялық маңызы бар көшелерінің бірі. Қала ішінде жолаушы және жүк көліктерінің негізгі ағыны дәл осы даңғыл арқылы өтеді. Сол себепті бұл жолдың жаңартылуы қалалық көлік жүйесінің тиімділігін арттыруда шешуші рөл атқарады. Жаңартылған жол тек көлік жүргізушілері үшін ғана емес, жаяу жүргіншілер мен тұрғындар үшін де ыңғайлы әрі қауіпсіз орта қалыптастырады.

Түркістан қаласы күн санап жаңарып, инфрақұрылымы заманауи талаптарға сай жетілдірілуде. Тәуке хан даңғылының жаңғыруы – қаланың дамуы мен тұрғындарға қолайлы орта қалыптастыру бағытындағы нақты қадам. Қала басшылығы тарапынан қолға алынған бұл жұмыс — тек жол жөндеу ғана емес, Түркістанның бүгінгі келбеті мен ертеңгі болашағы арасындағы алтын көпір. Ал сапалы жол — жайлылықтың, қауіпсіздіктің және тұрақты дамудың негізі.