АУДАН ӘКІМІ ҚЫЗЫЛЖАРЛЫҚТАРМЕН КЕЗДЕСТІ

Сарыағаш ауданының әкімі Арман Абдуллаев Қызылжар ауылдық округінің тұрғындарымен кездесті. Бұл кездесу — аудан көлемінде жүйелі түрде өткізіліп келе жатқан, тұрғындардың ұсыныс-пікірлерін тыңдауға және олардың шешімін табуға бағытталған ашық форматтағы жүздесулердің бірі. Жиынның басты мақсаты — ауылдық округтің әлеуметтік-экономикалық дамуы, инфрақұрылымдық жобалардың жүзеге асырылуы және тұрғындардың өмір сапасын арттыру бағытында атқарылған жұмыстардың нәтижесін баяндау болды.

Кездесуде аудан әкімі Арман Абдуллаев ауылдық округ аумағында атқарылған жұмыстарға кеңінен тоқталып, әрбір жобаның ауылдың дамуына қосқан үлесін атап өтті. Әкімнің айтуынша, соңғы жылдары Қызылжар ауылдық округінде әлеуметтік және инженерлік инфрақұрылымды жаңарту бағытында айтарлықтай өзгерістер орын алған. Бұл өзгерістердің барлығы халықтың тұрмыс сапасын жақсартуға және ауылдың өркендеуіне бағытталған. Жиын кезінде ауыл ақсақалы сөз алып, аудан басшысының ауыл халқының талап-тілегіне ерекше көңіл бөліп, әр мәселенің орындалу барысын нақты түсіндіріп жүргеніне ризашылығын білдірді. Нақтырағы «Тұрғындардың уәжін тыңдап, орындалған және орындалмаған мәселелердің себебін ашық айтып жатқаныңызға алғыс айтамыз. Бастысы – барлық істің нәтижесі халықтың белсенділігіне де байланысты. Жұмысыңызға сәттілік тілейміз» деді ауыл ақсақалы. Бұл сөздер ауыл мен билік арасындағы өзара сенімнің артып келе жатқанын көрсетті. «Халық үніне құлақ асатын мемлекет» қағидатының аясында өткізілген мұндай кездесулер тұрғындар мен билік өкілдері арасындағы байланысты күшейтіп, қоғамдағы ашықтық пен жауапкершілік мәдениетін қалыптастыруға ықпал етуде. Қызылжар ауылдық округіне қарасты елді мекендерде соңғы уақытта бірнеше маңызды инфрақұрылымдық жобалар жүзеге асырылды. Соның ішінде ең ауқымдысы — тұрғындарды табиғи газбен қамту мәселесі. Қызылжар және Жаскешу елді мекендеріне жаңадан қосылған аумақтардағы 524 үйге газ тарту үшін облыстық бюджет есебінен қаржы бөлінді. Құрылыс жұмыстарын «КАЗмонтаж строй» жауапкершілігі шектеулі серіктестігі жүргізіп, қазіргі таңда 189 үй толықтай табиғи газға қосылды. Ал 283 үй «Қарабастау» ЖШС тарапынан Жібек жолы автоматтандырылған газ тарту станциясына қосылу жұмыстары жүргізілуде. Қалған үйлер бойынша қажетті құжаттар дайындалып, тұрғындар кезең-кезеңімен көгілдір отын жүйесіне қосылмақ.

Бұл жобаның жүзеге асуы ауыл халқының өмір сапасын айтарлықтай жақсартып, тұрмыстық жағдайды жеңілдетеді. Бұрын қатты отынға тәуелді болған тұрғындар енді экологиялық тұрғыдан таза әрі тиімді энергия көзіне қол жеткізіп отыр. Сонымен қатар ауыл көшелерін жарықтандыру бағытында да айтарлықтай ілгерілеу бар. Қызылжар елді мекенінің Жастар көшесіне 30, ал Иса Сағынұлы көшесіне 21 жарықшам орнатылды. Бұл жұмыстардың нәтижесінде ауыл көшелері кешкі уақытта толық жарықтанып, тұрғындардың қауіпсіздігі мен жайлылығы артты. Инфрақұрылымдық жобалардың қатарында балалар мен жастарға арналған демалыс және ойын алаңдарының құрылысы да бар. Қызылжар елді мекенінің Ахмет би көшесінде балалар ойын алаңы салынды. Мердігер компания — «GREEN TREE-KZ» ЖШС. Бұл алаң ауыл балаларының бос уақытын тиімді өткізуге, салауатты өмір салтын ұстануға жағдай жасап отыр. Ауыл шаруашылығына қажетті су ресурстарын тиімді пайдалану бағытында да маңызды жұмыстар атқарылды. Тұрғындардың егістік алқаптарын сумен қамтамасыз ету мақсатында «Фронтовой» қашыртқысынан және «47 тармақ» каналынан насос арқылы су жеткізу үшін ұзындығы 1 шақырым, диаметрі 300 миллиметр болатын құбыр тартылды. Қазіргі уақытта электр желісі тартылып, насос орнату жұмыстары жүргізілуде. Бұл жобаны «Қазақ Тех Строй» ЖШС жүзеге асыруда. Жоспар бойынша нысан жыл соңына дейін толық пайдалануға берілмек. Жаскешу елді мекенінде де айтарлықтай жаңартулар орын алды. Мұнда 38 жарықшам жаңартылып, елді мекеннің көшелері кешкі уақытта жарықтандырылды. Сондай-ақ, биыл 900 орындық «Келешек» мектеп ғимаратының құрылысы аяқталып, жаңа оқу жылында пайдалануға берілді. Бұл жаңа білім ошағы ауыл балаларына заманауи стандарттарға сай оқу мүмкіндігін ұсынып, жас ұрпақтың сапалы білім алуына жағдай жасайды.

Сондай-ақ, округ аумағындағы ирригациялық жүйелерді жақсарту бағытында да ауқымды жұмыстар жүргізілді. Атап айтқанда, «Р-12-К» қашыртқысының 3 шақырымы және «Р-13-К» қашыртқысының 6,5 шақырымы тазаланып, жалпы ұзындығы 9,5 шақырым болатын су арналары механикалық тазалаудан өтті. Бұл жұмыстар егістік жерлердің суару мүмкіндігін арттырып, ауыл шаруашылығы өнімдерінің өнімділігін көбейтуге септігін тигізеді. Аудан әкімі Арман Абдуллаев кездесуді қорытындылай келе, барлық атқарылған жұмыстардың түпкі нәтижесі — халықтың әл-ауқатын арттыру мен ауылдың тұрақты дамуына бағытталғанын атап өтті. Ол тұрғындардың белсенділігі мен ұсыныстары әрқашан назарда болатынын және көтерілген мәселелердің барлығы нақты бақылауда екенін жеткізді. Қызылжар ауылдық округінде жүзеге асырылып жатқан осындай жобалар — ауыл өмірінің жаңаруына, әлеуметтік жағдайдың тұрақтануына және тұрғындардың өз ауылына деген мақтанышының артуына жол ашты. Халық пен билік арасындағы тығыз байланыс, өзара сенім мен жауапкершілік ауылдың өркендеуіне серпін беріп отыр. Қорыта келгенде, Қызылжар ауылдық округінде жүргізілген жұмыстар — мемлекеттің ауылдық аумақтарды дамытуға бағытталған саясатының нақты жемісі. Таза ауыз су, жарық, газ, жол және әлеуметтік нысандар — тұрғындардың өмір сапасын жақсартудың басты көрсеткіші. Бұл игі істердің барлығы – жергілікті билік пен ауыл халқының бірлескен еңбегінің нәтижесі.