АЗАМАТТАРДЫҢ ӨТІНІШТЕРІ ЖҮЙЕЛІ ТҮРДЕ ҚАРАЛЫП, НАҚТЫ ШЕШІМДЕР ҚАБЫЛДАНУДА

Түркістан облысында тұрғындарды жеке қабылдау дәстүрге айналды. Бұл – Президент Қасым-Жомарт Тоқаевтың «Халық үніне құлақ асатын мемлекет» қағидасының өміршеңдігін дәлелдейтін нақты іс. Облыс әкімдігі халықтың пікірін тыңдап, әрбір азаматтың мәселесін шешуге бағытталған жүйелі жұмыстарды жалғастыруда. Осы бағыттағы кезекті жеке қабылдауды Түркістан облысы әкімінің орынбасары Нұрбол Тұрашбеков өткізді. Кестеге сәйкес ұйымдастырылған қабылдауға облыс тұрғындары түрлі әлеуметтік және құқықтық мәселелерін айтып, көмек сұрады. Кездесу барысында азаматтар жер қатынастары, құжат рәсімдеу, несие төлемдері мен әлеуметтік қолдау салалары бойынша өтініштерін жеткізді.

Қабылдауға келген әрбір тұрғын өз сұрағын ашық қойып, мәселенің мән-жайын толық түсіндірді. Облыс әкімінің орынбасары олардың әрқайсысын мұқият тыңдап, жағдайға байланысты тиісті сала мамандарын тарта отырып түсіндіру жұмыстарын жүргізді. Бірқатар мәселелер сол жерде шешімін тапса, құқықтық және сот тәртібімен шешуді қажет ететін өтініштер бойынша азаматтарға кеңес берілді. Кездесу онлайн және офлайн форматта қатар өтті. Мақтаарал ауданынан бейнебайланыс арқылы қосылған тұрғын өз иелігіндегі жер телімінің кадастрлық базаға тіркелмегенін айтып, көмек сұрады. Ол бұл мәселе бірнеше жылдан бері шешілмей келе жатқанын атап өтті. Нұрбол Тұрашбеков бұл өтінішті назарға алып, жер қатынастары басқармасына жағдайды нақтылап, тиісті шешім қабылдау жөнінде тапсырма берді. Онлайн байланыс арқылы қатысқан тағы бір азаматша да үйіргелік жер телімін рәсімдеуге қатысты сұрақ қойды. Түсіндірме жұмыстары барысында жерге қатысты заңнаманың талаптары мен рәсімдеу жолдары егжей-тегжейлі түсіндірілді. Әкім орынбасары бұл бағыттағы жұмыстардың барлығы заң аясында жүзеге асатынын, әрбір азаматқа жергілікті атқарушы органдар тарапынан қажетті қолдау көрсетілетінін айтты. Кентау қаласынан келген қария өз иелігіндегі бау-бақшалық жер телімін заңдастыру мәселесін көтерді. Ол ұзақ жылдар бойы пайдаланып келе жатқан жердің құжаттарын рәсімдеуде кедергілер бар екенін жеткізді. Бұл сұрақ бойынша жауапты мамандарға нақты тапсырмалар беріліп, тиісті түсіндіру жұмыстары жүргізілді.

Сонымен қатар қабылдауда несие төлеміне байланысты мәселе де қозғалды. Түркістан қаласының тұрғыны Ауыл шаруашылығы кредиттік корпорациясы алдындағы қарызын өтеу бойынша жүктемені қайта қарау жөнінде өтініш білдірді. Бұл жағдай бойынша Нұрбол Тұрашбеков мәселені заң шеңберінде қарап, азаматтың әлеуметтік жағдайын ескере отырып, жеңілдетілген тәртіппен шешу мүмкіндігін қарастыруды тапсырды. Жеке қабылдау барысында азаматтарға тек нақты шешімдер ғана емес, құқықтық кеңестер де берілді. Тұрғындар өз өтініштерінің қандай жағдайда сот тәртібімен қаралуы мүмкін екенін, сондай-ақ әкімдік тарапынан қандай қолдау тетіктері бар екенін білді. Облыс әкімінің орынбасары Нұрбол Тұрашбеков сот құзырындағы істерге әкімдік араласа алмайтынын, алайда түсіндіру және құқықтық көмек көрсету бағытында барлық мүмкіндік қарастырылатынын атап өтті. Қабылдау соңында ол тұрғындардың белсенділігіне алғыс айтып, мұндай кездесулердің жалғаса беретінін айтты. «Әрбір азаматтың өтініші – біздің жұмысымыздың негізі. Сондықтан халықтың пікірін тыңдау, олардың ұсыныстарын ескеру – басты міндетіміз. Барлық мәселе заң аясында, әділ шешімін табуы тиіс», – деді Нұрбол Тұрашбеков.

Айта кету керек, Түркістан облысында тұрғындарды жеке қабылдау кестесі алдын ала бекітіліп, ай сайын тұрақты өткізіліп келеді. Мұндай форматтағы кездесулер жергілікті билік пен халық арасындағы байланыс пен сенімді нығайтуға бағытталған. Әрбір өтініш арнайы журналға тіркеліп, орындалу барысы бақылауға алынады. Бұл жүйе азаматтардың мәселелерін уақытылы және әділ қарауға мүмкіндік береді. Бүгінде облыс әкімдігі қабылдауларды онлайн форматта өткізу тәжірибесін кеңінен енгізіп отыр. Бұл шалғай ауыл тұрғындарына өз мәселесін жеткізуге жағдай жасайды. Сонымен қатар, қабылдауға жазылу процесі де жеңілдетілген. Азаматтар egov.kz порталы, e-otinish жүйесі арқылы немесе облыстық әкімдіктің «Ашық әкімдік» кеңсесіне келіп, жазбаша түрде өтініш қалдыру мүмкіндігіне ие. Мұндай шаралар Түркістан облысының тұрғындары үшін мемлекеттік органдарға деген сенімді арттырып, азаматтардың белсенді азаматтық ұстанымын қалыптастыруға ықпал етуде. Тікелей қабылдаулар барысында тұрғындар өз мәселесін жеткізіп қана қоймай, шешім қабылдау процесіне де куә болады. Бұл – биліктің ашықтығы мен халыққа жақындығын көрсететін нақты қадам. Қорыта айтқанда, Нұрбол Тұрашбеков өткізген жеке қабылдау – аймақ тұрғындарының күнделікті өміріндегі нақты мәселелерді шешуге бағытталған маңызды шара болды. Осындай кездесулердің арқасында көптеген азаматтар өз сұрағына нақты жауап алып, кейбірі сол сәтте-ақ нәтижесін көрді. Облыс әкімдігі алдағы уақытта да азаматтарды қабылдау және өтініштерді қарау жұмыстарын жүйелі түрде жалғастыруды жоспарлап отыр.